Ճաշից քիչ անց

Ճաշից քիչ անց

երբ արևը

պատուհանիս ճիշտ կենտրոնում է

և Աստված

առիթից օգտվելով

իր հարյուր գրպանանի

պատմուճանը հագին

մի վճարովի

հաշվարկված հրաշք է փորձարկում

սեղանիս մոտ

(ասենք... ժամանակավորապես

կենդանացնում է ինչ-որ կոնկրետ

մի մեռյալի)

ես

այնուամենայնիվ

Նրան

չխոցելու համար

փորձում եմ զարմացած ձևանալ

և ճիգով... կլորացնում եմ աչքերս

իսկ սերե՜րս

լայնեզր օրերիս միջով

մե՜րկ

առանց հրաշագործի կեցվածք ընդունելու

սահում են

անկանխատեսելի հաջորդականությամբ

ինչպես գունավոր թաշկինակները

աճպարարի միջանցիկ գլխարկով

և իսկապես... անհետանում

ան-վերադարձ