Անքնությունը

Անքնությունը

վայրենի գազան

ութոտնանի

անցնում է վրայովս

կոխկրտելով ինձ

մանրամասն

ոտքերի տակ

վաղորդյան թռչուն

դեղնակտուց

ծլվլոցդ զվարթ

արթնացնում է միայն

պոետներին

(որոնք քնած չեն առանց այդ էլ)

իսկ քնածներին

այն սոսկ կենսատու շրջում է

անկողնու մեջ

թռչո՛ւն

դայլայլդ կարո՞ղ է

ընդհատել պատերազմն այս

թե ոչ`

վերջ տուր աղմուկիդ

ու

փոխարենը

դարմանիր վերքերս այսուհետ

թռչունը շվացրեց անտարբեր

ի պատասխան

ասես ինքն Աստված է

այլ ոչ թե ծիտ