ԱՆԹԱՓԱՆՑ ԹՌՉՈՒՆ

Փրկեա Տեր թուղթն իմ

չկայացած երգի փորձությունից

ու թույլ մի տուր

որ այն սահի անվերջ

սաղարթների միջով ու կտրատվի

կտուցների վրա հիմար թռչունների

ես գնում եմ

իսկ դուք այսուհետեւ

լսեք թռչնիս երգը կյանքիս մասին

որ կլինի վավերական հիմնականում

չնչին զեղումներով

այստեղ-այնտեղ

դարձնելու այն առավել հետաքրքիր

ես` բոդլերյան հոգիս անուղղելի

որ սիրում է թափառել ամենուրեք

չլինելով երբեք կոնկրետ մի տեղ

որտեղ էլ որ լինեմ

միեւնույն է

չեմ զգալու ինձ տանը ամբողջովին

քանզի հայ եմ ու բանաստեղծ

կրկնակի գաղթական հավերժորեն

մի ոտքս երկրի վրա մյուսը օդում

քամին ինձ թռցնում է ուզածի պես

կյանքս շարժվող կրկես

անիվների վրա

մի օր այստեղ եմ

մի օր այնտեղ

ես մահվան մասին հիշում եմ սոսկ

երբ մի անթափանց գաղթող թռչուն

փակում է ամպեղեն տեսադաշտն իմ

մի համառոտ պահ

հավերժի մեջ